Faq

• Dulà puedio meti i diviers gjenars di refudums?
  Par risolvi ogni dubi si pues consultâ il materiâl consegnât a dutis lis fameis, clamâ il numar vert di Isontina Ambiente 800844344 o discjamâ IsApp e interogâ la sô Riciclopedie.
• Ce puedio fâ cun panzits e siringjis?
  Pa conferiment di panzits e siringjis a vegnin dâts al citadin contignidôrs di pueste. In particolâr pai panzits pai frut e pai adults al ven consegnât un bidon zâl (che al ven disvuedât te stesse maniere previodude pal refudum sec residui), pes siringjis dopradis, invezit, al è previodût un seglot autosigjilant di conferî, cuant che al è plen, adun cul refudum sec residui. La consegne e je par cure di Isontina Ambiente a Gurize, Roncjis di Monfalcon, Romans dal Lusinç, Turiac, Savogne dal Lusinç, Segrât, Fare, Marian e Vilès; cui che al è a stâ in chei altris comuns gjestîts di Isontina Ambiente al à di indreçâsi ai uficis comunâi.
• Puedio doprâ i sacuts de spese par conferî i miei refudums?
  I sacuts e chei altris materiâi pal conferiment consegnâts une volte ad an cjase par cjase di Isontina Ambiente, a son stâts volûts par permeti un just conferiment dal refudum di bande dal citadin e par judâ i operadôrs che a fasin la racuelte, a identificâ il contignidôr di puartâ vie. Isontina Ambiente e domande che a vegnin doprâts dome i sacs che e furnìs ai utents, ma pal conferiment dal refudum umit e permet che a vegnin doprâts i sacuts in Mater-bi comprâts cu lis pomis e la verdure intai supermarcjâts.
• Cuâi sono i comuns dulà che la racuelte dal refudum sec e ven fate cul contignidôr etichetât?
  La racuelte dal refudum sec e ven fate cul contignidôr etichetât in ducj i comuns gjestîts di Isontina Ambiente, fûr che Gurize, Monfalcon e Duin. Roncjis di Monfalcon e Grau a dopraran chest sisteme cul 2019.
• Parcè no isal pussibil conferî il refudum umit intai centris di racuelte?
  La normative provinciâl no permet di puartâ il materiâl umit intai centris di racuelte par vie che no son furnîts di vascjis pe racuelte dal percolât.
• Parcè no puedio meti inte plastiche ducj i materiâi che a àn il simbul dal ricicli ma dome i contignidôrs?
  Il motîf al è leât al funzionament dal CONAI: chest al tasse i produtôrs e i impuartadôrs di imbalaçs par une sume proporzionâl al pês dal materiâl introdusût sul marcjât.
  Chestis sumis a vegnin po dopo tornadis ai Comuns in proporzion al cuantitatîf di materiâl che il Comun stes al cjape sù intun an.
  I materiâi plastics che no son contignidôrs, di norme, no jentrin inte categorie dai materiâi che a àn di paiâ il contribût al CONAI, e par chest no vegnin acetâts de filiere de plastiche e scartâts.
  Atenzion però che a tacâ di Avrîl dal 2012 plats e tacis di plastiche a vegnin cjapâts sù cu la plastiche di imbalaç!
  
• Ce aio di fâ cul vert e cui refudums di grandis dimensions?
  Vert e refudums di grandis dimensions si puedin conferî cun dôs modalitâts diviersis:
  • puartantju di persone li dal ecoplaçâl di riferiment
  • domandant la racuelte a domicili che e ven fate dopo vê prenotât il servizi clamant il numar vert di Isontina Ambiente 800 844 344.
  In cierts Comuns il vert si pues conferîlu ancje intes benis stradâls di pueste.
  Verifiche intal sît cemût che e funzione la racuelte dal vert e dai refudums di grandis dimensions intal to Comun inte pagjine Servizis / Racuelte dai refudums.
  
• Lis utencis no privadis puedino doprâ i centris di racuelte?
  Sì, i centris di racuelte a son a disposizion no dome pai citadins privâts ma ancje pes utencis no privadis in conformitât cun ce che al è previodût dai regolaments comunâi in materie di assimilabilitât.
• Se il camion si dismentee di cjapâ sù il sac dai refudums, ce aio di fâ?
  Al baste segnalâ la mancjade racuelte al numar vert 800 844 344, compilâ il modul "segnale une anomalie" inte sezion "Servizis" dal sît isontinambiente.it, o inviâ une foto midiant IsApp, e Isa e cjaparà in caric la segnalazion inviant une scuadre che si interessarà di puartâ vie il sac no cjapât sù.
• Se o met fûr il refudum in ritart, vegnial cjapât sù in ogni câs?
  No, il refudum si à di metilu fûr la sere prime de zornade previodude pe racuelte di ogni singule tipologjie di refudum: la esposizion in ritart e oblee il citadin a ritirâ il sac e a metilu fûr inte prime zornade buine seguitive.
• Ce aio di fâ intal câs che sul gno refudum al vegni metût sù un bolin colôr naranç?
  Il bolin colôr naranç al segnale un conferiment sbaliât.
  In particolâr si pues vê metût fûr il refudum inte zornade sbaliade, doprât sacuts diviers di chei previodûts di Isontina Ambiene, metût dentri tai sacuts materiâi no juscj.
  Il citadin al pues domandâ al call center sclariments sui motîfs de mancjade racuelte e sul bolin. In ogni câs il sacut al va gjavât de strade e metût fûr in maniere juste la prime zornade buine seguitive.
  
• Cemût aial di fâ un gnûf resident par ritirâ la dotazion pal conferiment dai refudums?
  Il citadin, tal moment che si iscrîf ai regjistris dal so comun, al ricêf dal Comun stes o di Isontina Ambiente dut il materiâl par conferî i refudums inte maniere juste.
  Inte sezion "servizis / racuelte puarte par puarte: dulà ritirâ la dotazion" dal sît di Isontina Ambiente, a son a disposizion lis indicazions par ritirâ la dotazion in vore in ogni Comun.
  
• Cuant che i sacuts de prime dotazion a son finîts, a cui vino di indreçâsi par vênt altris?
  Finide la dotazion che Isontina Ambiente e consegne a dutis lis utencis une volte ad an, prime de gnove riconsegne anuâl i sacuts si puedin comprâ intune schirie di esercizis comerciâi. La liste complete si cjate sul sît di Isontina Ambiente.
• Cemût si fasial a savê in cuale aree che e je la proprie vie di residence?
  Il calendari des racueltis che al ven consegnât a ogni utent al riferìs la aree di riferiment. La informazion si pues vê ancje dal sît aziendâl o di ISApp.
• Ce vuelial dî “gjestion a caric dal citadin/condomini di bidons e scovaçons”?
  Bidons e scovaçons a son gjestîts dal citadin che si ocupe di metiju fûr su la strade principâl la sere prime de zornade de racuelte e di lavâju. Par chest al è oportun marcâ che, cuant che il conferiment al ven fat cu la juste atenzion, l'unic materiâl che al pues presentâ problemis igjienics al è l'umit. Par evitâ chest probleme si consee di meti intal bidon maron sacs di dimensions adatis che a fasin di fodre pal contignidôr stes.
• Parcè il refudum umit vegnial cjapât sù dome dôs voltis par setemane?
  Il refudum umit al ven cjapât sù cu la frecuence di dôs voltis par setemane parcè che la rese cuantitative complessive no dipent dal numar des racueltis.
  Ogni Comun al sielç tropis racueltis che a àn di jessi fatis tal so teritori ancje considerant i coscj.
• Tal câs di dubi fuart sul contignidôr dulà che al va metût un determinât refudum cemût aio di compuartâmi se no rivi a vê une rispueste sigure?
  La regule che e permet di no fâ erôrs pericolôs par dute la cjame dai refudums cjapâts sù, e je chê di meti il refudum di destinazion incierte intal sac dal sec residui. Par rispuindi a dubis eventuâi sul just conferiment dal refudum singul, si pues domandâ jutori al numar vert 800844344 o ae Riciclopedie a disposizion sul sît e su ISApp.
• Sino sigûrs che i materiâi che il citadin al conferìs in maniere separade no vegnin po dopo miscliçâts ducj insiemi?
  No, chest nol sucêt e nol pues sucedi stant che la racuelte di ogni materiâl e ven fate cun mieçs dedicâts ae racuelte dal materiâl singul.
• Dulà si butino pilis e medisinis scjadudis?
  Pilis e medisinis scjadudis si puedin butâ intai contignidôrs stradâi di pueste, restant simpri l'oblic pai tabachins e pes farmaciis di ritirâju.
• Se la zornade di racuelte de zone dulà che si è a stâ e cole intune zornade di fieste cemût si aial di compuartâsi?
  Se la zornade di racuelte e cole intune zornade di fieste, si à di verificâ sul calendari di pueste se la racuelte e je stade posticipade o mancul; par solit il servizi al ven fat ancje intes zornadis di fieste, fûr che in câs particolârs ripuartâts sul calendari.
• Esistino servizis specifics ancje pai anzians e par altris categoriis protetis?
  Si, intai comuns di Gurize, Roncjis di Monfalcon e Monfalcon a son stadis ativadis racueltis di refudums "facilitadis" che a previodin l'ûs di sacs verts.
  I sacs a son consegnâts dal comun o di Isontina Ambiente.
• Cui che al è a stâ intune strade privade dulà che il camion nol rive a zirâ cemût aial di compuartâsi?
  Prime di inviâ il servizi, il personâl di Isontina Ambiente compagnât dai tecnics comunâi, al fâs un sorelûc in dut il comun. Intal câs che a sedin identificadis stradis particolârs dulà che i mieçs pe racuelte no rivin a acedi, al ven consegnât un volantin dulà che al è indicât il pont dulà che si à di meti fûr il propri refudum. Al è just ricuardâ che Isontina Ambiente e à mieçs di dimensions diviersis, che a ridusin al minim lis situazions di impussibilitât di manovre.
• Cui netial i contignidôrs condominiâi?
  La cure dai contignidôrs condominiâi e je compit dai condominis; te stesse maniere i contignidôrs singui a son sot de responsabilitât dai utents che a lôr ur son stâts assegnâts.
  Su domande dal comun, Isontina Ambiente e je disponibile al servizi acessori di lavade dai scovaçons di fâ in maniere periodiche cun frecuence sielte dal comitent.
• Dulà puedio meti lis casselis di plastiche o i scjatulons di carton di grandis dimensions e che no jentrin tal sac blanc?
  Casselis e cartons si puedin meti fûr in bande dal contignidôr doprât pal conferiment de cjarte.
• Puedio lassâ il scovaçon condominiâl simpri su la strade?
  Se il sisteme di racuelte puarte par puarte al ves di jessi aplicât cu lis stessis modalitâts ativis intal rest de provincie, dopo ogni disvuedament il scovaçon condominiâl al varès di jessi ripuartât inte proprietât privade. A son però scovaçons che no oblearessin i citadins a lassâju inte proprietât publiche, tant che i scovaçons cu la clâf, che a garantissin in ogni câs une cualitât otime dal refudum cjapât sù.
• Cemût fasio a distingui il gno contignidôr dai refudums di chel dal gno vicin di cjase?
  Dentri te dotazion pal conferiment dai refudums al è ancje un adesîf di aplicâ sul singul contignidôr dulà che si pues meti il propri cognon o un altri segn di ricognossiment.
• Se o voi in feriis e o ai refudums che a vegnin cjapâts sù dome cualchi dì dopo de mê partence cemût fasio par liberâmi di lôr?
  L’unic refudum che, se al reste in cjase plui dîs, al cause problemis al è il refudum umit. Chês altris tipologjiis di refudum no pucin.
  Duncje, restant che chest probleme al pues rivuardâ dome chei che a son a stâ in cjasis singulis o in edificis cun al plui 5 fameis (cui che al è a stâ in edificis plui grancj, di fat, al à a sô disposizion il scovaçon condominiâl), si pues domandâ la colaborazion dal vicin o, in alternative, doprâ i scovaçons disponibii intai lûcs publics tant che il cimitieri.
• Lis confezions di plastiche, i bussui di alumini, … si aial di lavâju prime di butâju vie?
  Lavâ i contignidôrs pal mangjâ al è conseât ma no obligatori. I contignidôrs no lavâts però a puedin puçâ.
• Se o vuei meti fûr il sac cence che al sedi pussibil viodi ce che al è dentri, ce aio di fâ?
  Il refudum prime di jessi metût intal sac Isontina Ambiente si pues metilu dentri di cualsisei sacut: in ogni câs il sac esterni metût fûr su la strade al à di jessi chel furnît di Isontina Ambiente.
• I refudums, cuant che a son metûts fûr, a puedin jessi sparniçâts ator par vandalisim: cui aial di netâ lis areis interessadis intal câs che al sucedi?
  Intai comuns dulà che al è atîf il servizi puarte par puarte, dopo de conferme di cheste eventualitât, Isontina Ambiente e previôt a netâ cun intervents di pulizie integratîfs straordenaris.