L'implant di selezion

L’implant di selezion di Morâr al pues tratâ fin a plui o mancul 20.000 t/a di refudums costituîts di:

• Sec de racuelte diferenziade, costituît di plastichis e latinis
• Cjarte e carton
• Veri

L’implant al ricêf i refudums di ducj i comuns de provincie di Gurize e dai comuns di Duin-Nabresine, Sgonic – Zgonik e Monrupin, situâts inte provincie di Triest.

Cemût che al funzione

I refudums in jentrade a passin prin di dut pe postazion di pesadure che e regjistre la cjame, la tipologjie di refudum e il comun di provenience. La regjistrazion dai mieçs e ven gjestide dal personâl incaricât che al verifiche la nature dal refudum contignût tal camion, al procêt al regjistre la documentazion di jentrade e al mande il mieç a discjamâ.

Ogni tipologjie di refudum riciclabil e ven discjamade in areis dividudis su la fonde de tipologjie dal materiâl e daspò e je inviade ae lavorazion.

Il refudum in jentrade, discjamât dal camion, al ven po dopo cjamât cuntune pacare su gome te machine vierzisacs, za preimpuestade pe sielte de linie di selezion. Cheste sielte e je garantide par dutis lis tipologjiis di materiâl, midiant de impostazion di parametris di lavôr specifics

Une volte saltât fûr de machine vierzisacs, il materiâl al ven dividût une prime volte dal tamês balistic che lu separe daûr des dimensions. Il materiâl fin al ven metût intun box di pueste e po dopo puartât vie cu la frazion no riciclabile, il materiâl di dimension medie al è inviât ae linie di selezion automatiche, chel di misure plui grande al ven mandât aes cabinis de linie di selezion manuâl.

La linie di selezion automatiche, che si cjate suntun plan rialçât, e je costituide di un nastri traspuartadôr che al cor sot di trê letôrs che a individuin, cuntun scanner otic, lis diviersis tipologjiis dai materiâi, che po a separin cul jutori di aiar comprès. Chescj machinaris a son dotâts di computer di regolazion par impuestâ diviers programs di selezion e par podê jessi doprâts cun flessibilitât, sielzint cun precision il prodot che si vûl separâ.

Il control de cualitât dal materiâl selezionât dal letôr otic al è garantît di un operadôr che, in maniere costante, al verifiche e al corêç a man tal câs che a sedin erôrs dal machinari.

Ae fin de linie di selezion al è posizionât un strument in stât di separâ l’alumini midiant dal principi des corints indotis (une calamite che e slontane impen di tirâ dongje).

Daspò di jessi stâts selezionâts, i diviers materiâi a vegnin racuelts in box di ciment di pueste, posizionâts sot de linie di selezion.

Dai box, il materiâl al va tal nastri coletôr che al alimente la linie di pressadure dulà che, midiant dal intervent di un operadôr, par ogni tipologjie di materiâl a vegnin definîts i parametris di pressadure; chest par definî la lungjece des balis e la pression dal sburt, in mût di otimizâ il pês daûr di ce che a domandin chei che a riciclin.

Po dopo lis balis a vegnin inviadis al magazen e posizionadis su la fonde de tipologjie di materiâl intune aree specifiche, in spiete di jessi mandadis ai centris di destinazion finâl. Il materiâl che al jes al è regjistrât e documentât dal ufici pesadure.

L’implant di Morâr al selezione e al invie ai centris di recupar cjarte, carton, plastiche, metai ferôs, metai no ferôs e veri (che nol ven tratât ma dome imagazenât e inviât in maniere periodiche al implant di trasformazion). Ducj i materiâi tratâts dal implant a vegnin sometûts a di une analisi merceologjiche par verificâ i parametris cualitatîfs imponûts dai centris di ricicli dulà che po dopo a vegnin mandâts. Chestis analisis a coventin par determinâ la percentuâl di materiâi impropris presints intes balis, parametri che al determine la fasse cualitative dal materiâl e il relatîf contribût economic ricognossût pe sô lavorazion realizade tal acuardi ANCI – CONAI.

L’implant al è furnît di chescj sistemis ausiliaris principâi:

• sisteme di pesadure pai camions in jentrade e in jessude,
• centrâl di produzion dal aiar comprès par alimentâ i letôrs otics,
• sisteme di aspirazion dai polvars cun abatiment midiant di filtris a maniis,
• racuelte des aghis di percolazion che a van po dopo intune vascje in tiere e che a vegnin mandadis a smaltî intai centris autorizâts,
• sisteme antifûc cun rilevazion automatiche dal principi dal incendi,
• implant fotovoltaic sul cuviert dai fabricâts, pe produzion e cession in rêt di energjie eletriche.

La movimentazion dai materiâi e ven fate cun pacaris su gome o cui mulets.

Di un pâr di agns in ca tal implant di selezion al ven ancje imagazenât e selezionât il veri cjapât sù cu lis cjampanis stradâls.