L’implant di compostazion
L’implant di compostazion di Isontina Ambiente al è a Morâr, in localitât Gesimis.
L'implant (che in chest moment al è in fase di revamping) al pues tratâ ogni an fin a 18.000 toneladis di refudum costituît de frazion umide de racuelte diferenziade e dal vert di sfalçs e cerpiduris che a rivin di ducj i comuns de ex provincie di Gurize e dai comuns di Duin, Sgonic – Zgonik e Monrupin inte provincie di Triest.
Cemût che al funzione
Ducj i refudums organics che a jentrin tal implant di compostazion a vegnin controlâts de postazion di pesadure che, cuntun badge di ricognossiment in dotazion a ogni mieç che al fâs la racuelte, e regjistre in maniere automatiche il caric, il gjenar di refudum e di cuâl comun che al rive.
Il refudum vert in jentrade al ven metût suntun plaçâl esterni e masanât in spiete di jessi misturât cu la frazion umide, cheste invezit e ven metude in vascjis di contigniment di pueste dentri de aree di ricezion.
Une volte finît di misturâ (in medie 60% di umit e 40% di vert) e di messedâ, il compost al ven inviât in maniere automatiche ae sezion di ossidazion acelerade.
Cheste sezion e je componude di 7 corsiis lungjis 60 m., largjis 3 m. delimitadis di mûrs perimetrâi. Il materiâl depositât intes corsiis al ven movimentât cuntune machine che lu volte e che ogni dì lu puarte indevant a ogni so passaç di 4 m. La azion de machine e permet di ossigjenâ la misture e di favorî il procès di compostazion. Inte aree di ossidazion acelerade la misture umide verde e reste ferme par 21 zornadis.
Dute la ativitât de machine che e volte il materiâl e je gjestide midiant di un program dedicât che al monitore i moviments de machine che si môf dilunc des corsiis suntun carel di traslazion. Finide la fase di ossidazion acelerade, il materiâl al ven depositât inte aree di maturazion par un periodi minim di 70 dîs e movimentât dôs voltis al mês di une machine su gome, comandade di un operadôr in cabine pressurizade. Al è achì che si complete il procès di compostazion dal materiâl che, prime di jessi disponibil, al ven sometût a di un intervent di verifiche necessari par intercetâ eventuâi rescj no compostabii.
Ae fin dal so percors il compost al ven depositât intune aree di pueste in spiete di jessi confezionât o di jessi doprât; calcolant la diminuzion di pês e la pierdite di aghe che a caraterizin il procès di compostazion, de misture di vert e umit si à une cuantitât di compost ecuivalente al 30% dal materiâl che al è jentrât tal implant.
Ducj i locâi di tratament sierâts dal implant di compostazion a vegnin mantignûts intune lizere depression par favorî la aspirazion dal aiar, che al ven po dopo tratât di doi biofiltris che a operin un pe aree di maturazion, e chel altri pes areis di conferiment e di ossidazion acelerade. I biofiltris che a deodorin l'aiar aspirât dai locâi, a son struturis costituidis di grandis vascjis di ciment profondis cuasi 3 metris e dulà che dentri al ven deponût un strât di len masanât alt plui o mancul 2 m. L'aiar aspirât dai locâi midiant di condots aeris, al ven incanalât viers di un ventiladôr che lu sofle ae base de vascje, di dulà che al torne sù passant pal jet biofiltrant e dant fûr lis moleculis odorigjenis.
Il compost produsût al ven analizât in laboratori par certificânt la cualitât; cheste certificazion e ven furnide a ducj chei che po dopo lu doprin in grandis cuantitâts par ûs agricul.
Il compost al è doprât in particolâr pes culturis vitiviniculis ma ancje plui in gjenerâl par ducj i prodots agricui.
Intes diviersis fasis de compostazion a restin ancje altris refudums che a son tratâts intal rispiet des normis che a regolin il conferiment dai materiâi no riciclabii e che no si puedin tornâ a doprâ.
In particolâr i percolâts cjapâts sù te pavimentazion interne, il licuit gjenerât dai biofiltris, e lis aghis cjapadis sù intal plaçâl di gjestion dal vert, a vegnin imagazenâts intune vascje in tiere par jessi po dopo inviâts a smaltî tai centris di depurazion.