Cui che o sin

Isontina Ambiente

Isontina Ambiente e je la gnove denominazion di Ambiente Newco srl che i è subentrade in ducj i rapuarts juridics tacant dai 2.12.2013.

Isontina Ambiente e jere nassude tant che Ambiente Newco il prin di Zenâr dal 2011 dopo de procedure competitive che IRIS – Isontina Reti Integrate e Servizi e à metût in vore pe cession dai setôrs energjetics cu la riorganizazion seguitive des ativitâts relativis ae gjestion dai servizis publics locâi in materie ambientâl.

Tal stes moment de operazion di modifiche de sô denominazion tal Dicembar dal 2013, Isontina Ambiente, che fin a chê date e jere controlade dal dut di IRIS, e je deventade al 100% di proprietât dai 25 comuns de provincie di Gurize.
La societât e gjestìs i contrats dal servizi ambientâl, vâl a dî la racuelte, il traspuart e il smaltiment dai refudums solits urbans e assimilâts, di pulizie urbane e di gjestion dai implants di smaltiment e tratament, in vincjecinc comuns de provincie di Gurize (Caprive, Cormons, Dobardò, Dolegne dal Cuei, Fare, Foian e Redipuie, Gurize, Gardiscje, Grau, Marian, Migjee, Morâr, Monfalcon, Mosse, Romans dal Lusinç, Roncjis di Monfalcon, Segrât, San Lurinç Lisuntin, San Ganzian, San Florean dal Cuei, San Pieri dal Tiritori, Savogne dal Lusinç, Starançan, Turiac e Vilès) e in trê comuns de provincie di Triest (Duin e Nabresine, Sgonic, Monrupin).

Isontina Ambiente e davuelç il servizi public di gjestion ambientâl soredut par mieç di chestis ativitâts:

• Racuelte e traspuart dai RSU (des frazions riciclabilis e dal refudum sec residui)
• Tratament dai refudums organics (FORSU e vert) cu la gjestion dal so implant di compostazion di Morâr.
• Tratament de frazion secje riciclabile (cjarte/carton e plastiche/latinis) tal implant di selezion di Morâr (di proprietât de societât)
• Trasferiment de frazion secje residue dal refudum pal smaltiment intal termovalorizadôr di Triest.
• Gjestion dai Centris di Racuelte comunâi e/o sorecomunâi e des isulis ecologjichis.
• Ativitâts acessoriis di pulizie urbane (scovâ, disvuedâ i scovaçons stradâi, pront intervent).

La atenzion principâl di Isontina Ambiente intal compiment dai servizis e je chê indreçade ai stakeholders, in particolâr ai citadins, parcè che de lôr sodisfazion a dipendin ancje chês dai Comuns e dai ents di control.

Stant che la gjestion dai refudums e je un servizi public essenziâl, par Isontina Ambiente la creazion di valôr e la ricercje dal profit a passin in secont plan rispiet ae cualitât e aes modalitâts cemût che si davuelç il servizi. Modalitâts che a àn di conformâsi dal dut a ce che al è previodût de normative e de planificazion regjonâl, sore a ce che al è domandât dai Comuns socis fruitôrs dal servizi.